కిడ్నీ రాకెట్ ముఠా గుట్టు రట్టు, అలకానంద హాస్పటల్ సీజ్ చేసారు.
రాష్ట్ర రాజధానిలో కిడ్నీ రాకెట్‌ కలకలం రేపింది. రాచకొండ కమిషనరేట్‌ పరిధిలో సరూర్‌నగర్‌లోని అలకనంద ప్రైవేట్‌ ఆసు పత్రిలో కిడ్నీ మార్పిడిలు జరుగుతున్నట్టు పోలీసులకు ఫిర్యాదు అందడంతో వారు వైద్య ఆరోగ్య శాఖ అధికారులతో కలిసి రంగంలోకి దిగడంతో గుట్టు రట్టయింది. ఎప్పటి నుండో ఈ వ్యవహారం కొనసాగుతోందని . ఎంత మందికి కిడ్నీ మార్పిడి చేశారనే కోణాల్లో పోలీసులు లోతుగా విచారణ

జరుపుతున్నారు.హైదరాబాద్‌లో కిడ్నీ మార్పిడిలు చేస్తున్న ఆసుపత్రిపై పోలీసులు, వైద్య ఆరోగ్య శాఖ అధికారులు సంయుక్తంగా దాడులు నిర్వహించారు. ఆసుపత్రి లోపల నలుగురిని గుర్తించిన పోలీసులు వారికి కిడ్నీ శస్త్ర చికిత్స జరిగినట్టు తెలుసుకున్నారు . వారిలో ఇద్దరు దాతలు కాగా , మరో ఇద్దరు గ్రహీతలుగా భావిస్తున్నారు. వీరు కర్నాటక, తమిళనాడు రాష్ట్రాలకు చెందిన వారుగా గుర్తించారు. వీరు ఈ నెల 17 న ఆసుపత్రిలో చేరినట్టు సిబ్బంది తెలిపారు. వారిని ప్రశ్నించగా తాము కిడ్నీలో రాళ్లు తీసుకోవడానికి వచ్చినట్టు తెలిపారు.

కానీ అధికారుల పరిశీలనలో మాత్రం వారికి కిడ్నీ శస్త్ర చికిత్సలు జరిగినట్టు అనుమానాలు వ్యక్తమయ్యాయి. నలుగురికి కిడ్నీ మార్పిడి జరిగిందా లేదా అనే విషయాన్ని శాస్త్రీయంగా నిర్దారించేందుకు, వారిని గాంధీ ఆసుపత్రికి తరలించారు.అలకనంద ఆసుపత్రి గత ఆరు నెలల కింద ప్రారంభమైందని. ఈ ఆసుపత్రిలో చిన్నపాటి వైద్య చికిత్సలకు మాత్రమే అనుమతి ఉండగా ఇది తొమ్మిది పడకల ఆసుపత్రిగా వైద్య ఆరోగ్య శాఖ అధికారులు తెలిపారు. అయితే ఇక్కడ కిడ్నీ శస్త్ర చికిత్సలు వంటి వాటికి అనుమతి లేదని ,అయినప్పటికీ అక్రమంగా డబ్బు ఆశ చూపి పక్క రాష్ట్రాలకు చెందిన వారికి శస్త్ర చికిత్సలు చేస్తున్నట్టు అధికారులు గుర్తించారు. ప్రస్తుతం ఆసుపత్రిని అధికారులు సీజ్‌ చేశారు. ఈ వ్యవహారంలో ఆసుపత్రి ఇన్‌చార్జితో పాటు మరొకొందరిని పోలీసులు అదుపులోకి తీసుకుని ప్రశ్నిస్తున్నట్టు సమాచారం. పోలీసులు కేసు నమోదు చేసుకొని దర్యాప్తు చేస్తున్నారు . ఈ కిడ్నీ రాకెట్‌ వ్యవహారం నగరంలో చర్చనీయాంశంగా మారింది.